熱刺最後12分鐘失3球 英超史上最大崩潰

2020年10月19日 08:03
東網電視
更多新聞短片
《英超刨績王》加強版,最強數據一網打盡:http://win.on.cc/football/ 
周一(19日)凌晨英超上演戲劇性一戰,熱刺主場喺開賽16分鐘已經領先3比0下,下半場尾段派出回巢嘅加里夫巴利「二度首演」,點知呢位黑腳球星,竟然見證韋斯咸喺最後12分鐘內連追3球,結果兩隊踢成3比3平手,熱刺亦成為英超史上,第1支喺81分鐘仍然領先3球下贏唔到波球隊,製造英超史上最瘋狂崩潰。
熱刺開波氣勢強勁,只係用45秒就靠孫興民接應哈利卡尼長傳入波先開紀錄,哈利卡尼之後喺8分鐘同16分鐘閃電梅開二度,早早領先3球下完全控制戰局。眼見大局已定,熱刺領隊摩連奴72分鐘換入加里夫巴利,佢離開熱刺7年後再次回歸,估唔到一嚟就睇住球隊大崩潰。
韋斯咸82分鐘由法比安巴貝拿頭槌破蛋,3分鐘後熱刺中堅達雲臣山齊士將韋斯咸傳中球插水式頂入自己龍門,令比賽突掀高潮。補時階段熱刺曾有反擊機會,加里夫巴利殺入禁區面對龍門竟然射斜,結果韋斯咸去到補時4分鐘,由蘭仙尼炮彈式轟入世界波搶番1分。
摩連奴賽後被問到,加里夫巴利嘅上陣係咪為球隊帶嚟負面影響,摩連奴就話:「我真係完全唔覺得,但今場唔畀佢踢正選係一個好好嘅決定,我話畀人知加里夫巴利並冇特權,所有人都要為自己嘅位置拚命。好可惜巴利入唔到關鍵嘅第4球,但足球就係咁樣。」