VVD重傷屬最惡劣級別　紅軍中堅可以點排？

足球博彩神器，每日重心提供盡在《彩報》：http://win.on.cc/football/　

日前喺打吡戰重傷嘅利物浦中堅華基爾雲迪積克(VVD)，周日(18日)正式開刀做手術根治韌帶傷患，利物浦聲明表示VVD暫時未有復出時間表，不過據英國媒體消息，VVD今次係「第3級」嘅前十字韌帶撕裂，亦係程度最惡劣嘅級別，所以今季幾乎可以肯定會提早收咧。

呢位荷蘭中堅完成手術後，發表公開信強調會「更強大回歸」：「我依家會集中精神養傷，盡可能以最快速度回歸。雖然我非常失望，但亦深信困難之中就有機會，喺神嘅幫助下我會以更強姿態回歸，喺我嘅家人同利物浦上下支持之下，我會昂首迎戰所有挑戰。」

利物浦今夏本來已經想買中堅，只係最終未能成事，嚟緊1月轉會窗買人更加事在必行。喺未來2個幾月，利物浦將要依賴僅餘嘅2個常規中堅祖爾麥迪比同祖高美斯，不過高普之前亦曾經變陣，巴西中場法賓奴泰華利斯已多次客串過中堅位置，隊長佐敦軒達臣喺世冠盃亦試過出任中堅，加上尼達利菲臘斯同薜比雲丹貝治等小將，希望可以順利捱到去1月。