寸嘴熱刺迷一夜爆紅　蘭仙尼金球大熱

《英超刨績王》加強版，最強數據一網打盡：http://win.on.cc/football/　

熱刺主場對韋斯咸領先3球下被逼和，唔單止令球迷失望，仲令一位「寸嘴」熱刺粉絲一夜爆紅！

熱刺早早就贏到3比0後，去到72分鐘換入加里夫巴利，而垂死掙扎嘅韋斯咸冇耐亦換入近年因傷患困擾、甚少上陣嘅蘭仙尼，呢個時候熱刺球迷Ben Dolman就喺twitter留言諷刺：「我哋換入加里夫巴利，韋斯咸就換入蘭仙尼」，後面再加上幾個「笑到喊」嘅emoji，恥笑韋斯咸同熱刺級數相差太遠。

點知韋斯咸追下一球、追下又一球，最後更加憑蘭仙尼世界波追平，Ben Dolman嘅恥笑隨即瘋傳，短短7個鐘頭被轉載16,000次，亦有超過2,000個留言回應，當中包括韋斯咸球員，迪格蘭賴斯賽後抵死回復：「名垂千古！」後防馬蘇亞古亦抽水：「(韋斯咸就換入蘭仙尼)歷史從此改寫。」

今場係阿根廷球星蘭仙尼今季首度上陣，佢嘅炮彈式射門中楣底彈入，雖然球季尚早，但已經被睇好會係今季「最佳金球」嘅熱門之選。