卡雲尼馬古尼冇上飛機　無緣鬥PSG

《串績王》新登場，最強博彩盤路過關神器：http://win.on.cc/football/　

歐聯分組賽於周三（21日）凌晨開打，紅魔鬼曼聯於H組首戰作客法甲巴黎聖日耳門（PSG），根據英國傳媒周一（19日）報道，新加盟嘅烏拉圭前鋒卡雲尼及隊長哈利馬古尼皆未有隨隊出發，意味兩人肯定唔會喺今場比賽上陣。

烏拉圭前鋒卡雲尼喺轉會窗關閉前免費加盟紅魔鬼，不過由於佢已接近半年時間沒有正式比賽，而且因應防疫要求，早前需自我隔離14日，真正參與操練時間有限，所以冇足夠狀態為紅魔鬼上陣。卡雲尼加盟紅魔鬼前效力PSG七季，總共為球隊射入200球，係球會歷來入球最高紀錄保持者，可惜今次未能返回王子球場倒戈。

至於隊長哈利馬古尼近期喺球會及國家隊表現都受盡評擊，雖然領隊蘇斯克查對佢依然投以信心一票，上場對紐卡素繼續搵佢打正選，並頂入1球，不過為免外界繼續針對馬古尼，蘇斯克查今場決定畀佢休息。

曼聯喺H組對手除PSG之外，仲有上季打入歐聯4強、來自德國嘅RB萊比錫，與及上季土超冠軍巴沙克舒希。