新星搖籃！薩爾斯堡簽「美國夏維斯」

足球博彩神器，每日重心提供盡在《彩報》：http://win.on.cc/football/　

上屆歐聯一鳴驚人嘅奧地利勁旅薩爾斯堡，周四(22日)凌晨將會迎戰莫斯科火車頭，展開新一屆歐聯之旅。艾寧夏蘭特、南野拓實等球星上季都係歐聯打出名堂後，1月就被賣去歐洲豪門，薩爾斯堡作為新星搖藍，亦繼續搜羅各地新星進行「加工」，日前宣布用900萬歐元轉會費，收購費城聯嘅19歲中場班頓艾朗臣，呢位美國國腳曾被德國《圖片報》形容係「美國夏維斯」，佢今季上陣21場有4入波同4次助攻，佢暫時會繼續留喺費城聯，直到1月轉會窗重開先正式加盟。

薩爾斯堡近年出產唔少頂級球星，好似沙迪奧文尼、拿比基達、烏柏美卡奴等等，目前陣中亦有唔少搶手貨，包括匈牙利中場施素保斯拉爾、贊比亞前鋒達卡，都受到歐洲各大豪門垂青，如果歐聯分組賽有好表現，隨時冬季就會被撬走，班頓艾朗臣嘅加盟就相當及時。