法賓奴救空門　利物浦靠烏龍波險勝

《英超刨績王》加強版，最強數據一網打盡：http://win.on.cc/football/　

周四(22日)凌晨歐聯D組，英超盟主利物浦作客靠對手擺烏龍，以1比0險勝阿積士，法賓奴泰華利斯今場客串中堅，勇救空門，成為贏波功臣，華基爾雲迪積克(VVD)養傷之下，預料呢位巴西國腳將會繼續頂替VVD嘅中堅位置。

利物浦今場有唔少攻勢，但全場唯一一入球卻係烏龍波，35分鐘沙迪奧文尼由左路殺入禁區起腳，本來應該唔中目標，但阿積士後衞達利亞費高衝前想出腳解圍，個波反而省中佢入網。

阿積士臨完上半場前有機會扳平，杜辛泰迪治應接長傳，跑入禁區笠射，皮球已經笠過利物浦門將阿祖安卡斯迪路，幸好法賓奴泰華利斯及時喺龍門白界線前，用倒掛解圍，紅軍領隊高普真係抹一額汗。

加上換邊後，阿積士中場卡拉臣勁射中柱唔入，利物浦今場可以贏波，真係有運。