最後逃生門！羅美路或10.29去美職搵食

《英超刨績王》加強版，最強數據一網打盡：http://win.on.cc/football/　

曼聯後備門將羅美路冇份入選今季英超及歐聯大軍名單，成為名副其實嘅棄將。據悉，呢位33歲阿根廷鋼門將會同會方展開談判，爭取10月29日美職轉會窗關閉前，加盟美職球隊。

羅美路以往喺曼聯，只能踢盃賽，紅魔鬼收回23歲英格蘭門將甸恩軒達臣後，令羅美路更加冇上陣機會，原本佢想今夏離隊，但曼聯要求買家出1,000萬鎊轉會費，結果未能成事。

羅美路依家連英超及歐聯大軍名單都冇份，只能踢英聯盃及預備組賽事，自然無法忍受。英國傳媒指，羅美路願意放棄應有收入，希望曼聯畀佢自由身離隊。

羅美路早前已經由阿根廷返回英國，即將完成14日隔離，未來幾日就會同球會管理層攤牌，目標係趕及10月29日前去美職搵食。