華倫西亞3連敗　李康仁準備跳船

《串績王》新登場，最強博彩盤路過關神器：http://win.on.cc/football/　

西甲球會華倫西亞近年管理立立亂，班主林榮福引起多次內亂，球隊不斷換帥後成績亦每況愈下，今季聘用查維加西亞未見起色，周六(24日)凌晨作客1比2不敵艾爾切後，西甲錄得3連敗，據報南韓新星李康仁等多位球員都準備離隊。

華倫西亞今季賣走多位主力，實力變得更弱，今場作客艾爾切喺上半場已經連失2球。19歲南韓超新星李康仁今場先做後備，68分鐘先至被換入場，而佢落場6分鐘即刻交出致命直線，穿過晒成條艾爾切防線畀東尼拿圖單刀射入，可惜華倫西亞最後都要輸1比2。

據西班牙《阿斯報》報道，李康仁、基比爾包列斯達同荷西加耶3位主力，都已經拒絕華倫西亞續約要求，消息指李康仁今個夏天本來已經提出轉會，最後因為獲保證出場機會而留隊，但球隊管理問題仍然令球員缺乏信心，所以一定唔會續約。報道指3位球員當中，華倫西亞最擔心就係李康仁，因為球會視呢位南韓球星為球隊未來核心人物。