隆重登場!卡雲尼預告首演「砌車」

2020年10月24日 12:36
東網電視
更多新聞短片
《英超刨績王》加強版,最強數據一網打盡:http://win.on.cc/football/ 
喺月初轉會死線日加盟曼聯嘅烏拉圭前鋒卡雲尼,至今仍未為「紅魔鬼」上陣,不過周日(25日)凌晨英超大戰車路士,呢位烏拉圭國腳就好大機會處子登場,佢喺賽前接受訪問,已經預告定今場對住舊隊奴堤亞高施華,會有一個好特別嘅體驗。
33歲嘅卡雲尼今場若果為曼聯披甲,將會面對舊會巴黎聖日耳門多年戰友、36歲中堅堤亞高施華,卡雲尼賽後接受《EN24 News》訪問話:「喺球場再見番堤亞高施華真係好開心,佢非常專業,無論操練同熱身都非常認真,所以今場對住佢一啲都唔易踢,但我相信會係一次非常好嘅體驗。」
曼聯領隊蘇斯克查亦解釋卡雲尼遲遲未上陣原因:「卡雲尼希望喺各方面都達到100%先至上陣,我同佢傾過,開波前會做最後決定。」卡雲尼已隨曼聯大軍進駐球隊酒店,如無意外今場對車路士可以睇到佢表演。