英超重頭戲 「紅藍對決」有前冇後

2020年10月24日 16:00
東網電視
更多新聞短片
今晚英超爆發「紅藍對決」,曼聯喺主場硬撼車路士。曼聯雖然弗番連贏2場,但防線依然漏洞百出;車仔今季同樣攻強守弱,對住西布朗、修咸頓等中下游球隊亦要各失3粒,預計雙方今仗都係以攻代守,實多波入,2.5球嘅入球大係不二之選。(Now 621及611周日凌晨零時30分直播)
曼聯本周公布年度財政報告,受疫情影響,總收入下跌18.8%,由原本6.27億鎊下跌至5.09億鎊,足足跌咗1.18億鎊,當中轉播收入損失最多,由2.402億鎊下跌至1.412億鎊,真係睇見都肉赤。收入減少之餘,曼聯負債亦隨之急升,由1年前嘅2.036億鎊,上升至4.741億鎊,負債勁升132.9%。不過班主格拉沙家族仍然獲得約2,000萬鎊(約2.03億港元)年度分紅,堅無恥。由於疫情仍未過去,英超仲係閉門進行,呢個情況未知要持續到幾時,曼聯可能要勒緊褲頭過日子,未必可再大灑金錢買人。
雖然曼聯現有人腳唔差,周中歐聯作客巴黎聖日耳門憑拉舒福特絕殺險勝2比1,自聯賽1比6輸畀熱刺後已連贏2場,不過2場比賽都有失波,其中上輪聯賽對紐卡素除咗先失守,亦要多得門將迪基亞喺打和1比1時作出神救,避免再度落後,之後先有機會連轟3球致勝,無論用傳統4後衞或改踢3中堅,都畀唔到人信心,惟有靠近期腳風轉順嘅拉舒福特、般奴費南迪斯(足智彩前譯波基斯費南迪斯)用入球彌補後防缺陷。
車仔周中同樣要出戰歐聯,喺主場以0比0賽和西維爾,新加盟嘅塞內加爾門將艾度亞文迪傷愈復出,暫時解決門將不穩問題,不過由葛特蘇馬及安達斯基斯坦臣組成嘅中路組合,上輪聯賽對修咸頓形同虛設被逼和3比3,老將堤亞高施華周中歐聯又搏足全場,體力上未必可以接連應付2場大戰,好難頂得住近況甚弗嘅曼聯鋒線。好彩前線嘅迪姆華拿及夏維斯逐漸入局,上仗聯賽包辦球隊3個入波,令車仔開咧5場聯賽轟13粒,明顯有前冇後。兩軍上季4次交鋒,一共炮製13個入球,而且「紅魔」開季至今7場全開3球或以上,再開2.5球嘅大盤唔難。