拜仁大炒5球　法蘭克福：我哋輸得少過巴塞

《串績王》新登場，最強博彩盤路過關神器：http://win.on.cc/football/　

拜仁慕尼黑周六(24日)德甲主場5比0大破法蘭克福，波蘭前鋒羅拔利雲度夫斯基頭頂腳踢連中三元，近3場德甲個人獨取9球，開季5輪入10球成績更加打破德甲歷史紀錄！拜仁慕尼黑今場仲有利萊辛尼同埋新星穆夏拉各入1粒，最終輕輕鬆鬆大勝5比0。

不過，拜仁慕尼黑今場亦付出一定代價，加拿大超新星艾方素戴維斯開波3分鐘就受傷退下火線，消息指佢嘅右腳足踝韌帶受傷，將要休戰6至8個星期。至於「苦主」法蘭克福雖然慘敗，不過球會官方twitter就抵死發文：「我哋輸畀歐洲冠軍球隊，而且失球仲少過巴塞隆拿，我哋要保持樂觀。」拜仁慕尼黑上屆歐聯曾以8比2淘汰巴塞隆拿出局。