艾格斯助攻起孖 修咸頓破愛華頓不敗身

20201025
東網電視
更多新聞短片
(Getty Images)
《英超刨績王》加強版,最強數據一網打盡:http://win.on.cc/football/ 
英超周日好戲,修咸頓主場憑丹尼艾格斯交出2個靚助攻,主場以2:0擊敗排榜首嘅愛華頓,並打破「拖肥」今季不敗身。愛華頓輸波後續居榜首,但已被同市宿敵利物浦追至同分,領先優勢消失。
開賽早段修咸頓藉主場之利展開攻勢,12分鐘列特文一次快射,可惜貼柱出界,未能佔得甜頭,之後輪到愛華頓攻勢。
15分鐘,占士洛迪古斯主射罰球,有力度但欠角度,被阿歷士麥卡菲沒收,3分鐘後,基菲爾施古臣禁區頂施冷箭,阿歷士麥卡菲已投降,但皮球中楣彈出。
愛華頓攻完一輪冇料到,修咸頓又搶番主動,先有奧里奧爾羅美奧勁射,但過唔到比克福特,戰至27分鐘,丹尼艾格斯交個靚直線,禾特普斯右路靚入楔輕鬆攻破愛華頓大門,協助修咸頓領先1:0。
主隊得勢不饒人,35分鐘丹尼艾格斯左路落底線傳中,查阿當斯遠柱空晒輕易射成2:0。4分鐘後愛華頓再被史超活岩士唐攻破大門,不過越位在先判詐胡,愛華頓逃過一劫,修咸頓領先2:0完半場。
下半場形勢不變,安察洛堤見唔對路急變陣,換入戴爾夫及安東尼哥頓加強中場壓迫,但效果並不顯著,71分鐘愛華頓再遭打擊,盧卡斯迪治尼在中場追波,踩中對方守將獲加彼德斯足踝,並在地上拖行,盧卡斯迪治尼被球證直接紅牌趕出場,餘下時間10人應戰。
尾段兩隊都放慢節奏,修咸頓唔再攻,愛華頓亦無意收復失地,最終修咸頓贏2:0完場。