李斯特城絕殺阿仙奴！破47年魔咒

《英超刨績王》加強版，最強數據一網打盡：http://win.on.cc/football/　

周一(26日)凌晨英超大戰，李斯特城憑占美華迪喺80分鐘入波，作客以1比0絕殺阿仙奴，近47年首次作客擊敗兵工廠。占美華迪喺英超已經累積攻入阿仙奴11球，僅少過朗尼1球，成為第2號「爆廠Goal手」。

阿仙奴今場原本有機會先開紀錄，當時開賽僅4分鐘，拿卡錫迪頭槌攻門，皮球疑似撞到企喺越位位置嘅格列沙加入網，被判入波無效。之後布卡約沙卡、奧巴美揚攻門亦無功而還。

踢到80分鐘，李斯特城靠1次反擊得手，辛基斯安達接應長傳，殺入禁區右路傳中，占美華迪插水式飛頂入網，一箭定江山。

呢位33歲老將12次英超對阿仙奴，合共轟入11球，其中5球喺酋長球場射入，成為呢個球場入波最多嘅客隊球員，不愧為兵工廠剋星。