大衞施華2次助攻　皇蘇大勝升榜首

《串績王》新登場，最強博彩盤路過關神器：http://win.on.cc/football/　

34歲西班牙球星大衞施華寶刀未老，佢喺周一(26日)凌晨西甲貢獻2次助攻，協助皇家蘇斯達主場以4比1大勝侯爾斯卡，力壓踢少1場嘅皇馬，暫時升上榜首。

侯爾斯卡後衞柏保路馬菲奧喺35分鐘禁區內犯手球，被吹罰12碼，奧耶沙巴爾主射入網，為皇蘇打開紀錄。下半場一開波，侯爾斯卡前鋒拉菲爾美亞建功扳平，但奧耶沙巴爾好快再入1球，為皇蘇領先2比1。

之後成為大衞施華表演時間，佢先係擺脫對手2位球員之後，直傳畀樸圖射入，跟住長傳畀後備上陣嘅阿歷山大伊沙克勁射破網。

大衞施華自2010年1月之後，再次1場西甲貢獻2次助攻，同時以34歲零291日成為踏入21世紀以來，最老1場西甲2次助攻嘅皇蘇球員。估唔到大衞施華今夏離開曼城後，可以搵事業第二春。

皇家蘇斯達今季7場西甲取得4勝2和1負，比踢少1場嘅皇馬同CF格蘭納達多1分，暫時排榜首。