紐卡素奇兵「千日入球」逼和狼隊

足球博彩神器，每日重心提供盡在《彩報》：http://win.on.cc/football/　

周一(26日)凌晨英超，狼隊主場對紐卡素，最後10分鐘出戲劇性賽果，狼隊前鋒魯爾占美尼斯80分鐘建功，以為贏硬。不過，去到89分鐘，紐卡素翼衞積及梅菲主射罰球破網，亦係佢相隔1009日後，再次喺英超入波，協助紐卡素逼和狼隊1比1。

今場比賽之前，狼隊連續2場小勝1比0，魯爾占美尼斯勁射入網之後，以為又會開出1比0波膽，但估唔到，超過3年未喺英超入波嘅積及梅菲，竟然主射球入網，亦係紐卡素下半場唯一一次中目標射門，夠晒高效率。

25歲嘅積及梅菲喺諾域治出道，但有唔少時間被外借，先後被借去6支球隊。呢位前英格蘭U21小國腳3年前加盟紐卡素後，亦曾經被外借去西布朗同錫周三，今季先至重返紐卡素。

積及梅菲為紐卡素上陣46場只入3球，對上1次喺英超入波已經係2018年1月對曼城。相隔1009日後，積及梅菲再次喺英超入波，狼隊被逼和，都無話可說啦。