做VVD替工　利物浦同法賓奴傾續約

足球博彩神器，每日重心提供盡在《彩報》：http://win.on.cc/football/　

華基爾雲迪積克受傷長抖，利物浦最快要等冬窗重開先可以簽到新中堅，遠水難救近火，呢段時間高普就搵咗法賓奴泰華利斯做替工，所得效果唔錯，英國傳媒報道，會方認為呢位巴西中場仲有可塑性，準備同佢續約。

法賓奴於2018年中加盟，用咗唔少時間去適應利物浦打法，兩季多以來上陣89場入3球，漸漸成為球隊防線主力，擔任來回奔跑嘅全能中場，近兩年贏得歐聯及英超冠軍，佢都有一定功勞。

早前雲迪積克在默郡打吡受傷，復出無期，不時有消息稱利物浦將會買中堅，不過近期高普就搵法賓奴做替工踢中堅，歐聯首場作客阿積士佢即刻做嘢，一腳倒掛護空門力保不失，上場聯賽對錫菲聯雖然輸12碼，但嗰球波充滿爭議，法賓奴只係盡本份。

英國《ESPN》報道，法賓奴好使好用，合約到2022年到期，因此利物浦準備同佢續約，現時佢周薪係8.5萬鎊，至於VVD就有18萬鎊，既然搵佢做VVD替工，相信今次續約，條件唔會差嘅。