轉投傑志目標再提升 加維蘭豪言盡攬錦標

20201026
東網電視
更多新聞短片
前西班牙小國腳加維蘭(Manu),上季挾着2008年U17歐國盃冠軍之名來到愉園,在「快活谷」被寄予厚望,結果他亦不負所托,聯賽停擺前踢16場入10球,出色表現吸引傑志的垂青。今季轉投新東家,隨之而來是目標提升及回應外界更高的期望,然而Manu即立下豪言壯語︰「我要幫傑志贏晒所有比賽、贏晒所有錦標!」
圖/文︰黃雋謙
加入「藍鳥」後,Manu火速成為主力,於港超聯復賽4場中射入3粒,協助新東家捧走聯賽錦標,演出備受好評。他認為這座獎盃意義重大:「幫傑志聯賽封王係對我嘅一種認可,令我更快適應到傑志嘅打法。呢度有好多好高質素嘅球員,同佢哋做隊友會令我入到更多波。」
上季在「快活谷」,加維蘭在前線獨挑大樑,憑一己之力支撐起球隊的進攻。然而加入高手如雲的傑志後,Manu有時需要按教練要求擔任輔鋒,變相減少入球機會。不過,他卻不介意轉任配角:「我喺意大利同奧地利踢波嗰時都打過翼鋒,之後返番西班牙甚至擔任過第二前鋒。當然我嘅最佳位置係中鋒,但我非常樂意變更自己嘅位置,為隊友送上助攻。」
盼來年挑戰亞冠盃
加維蘭一年前受訪時曾說過,來香港踢球的首要目標先是提升表現,長遠來說則希望吸引到亞洲更高水平的聯賽青睞。如今重提目標,Manu明言目前只想到為新東家爭取佳績:「我眼前嘅目標係幫傑志贏晒所有比賽、贏晒所有錦標,未來嘅事冇人估到,足球世界咩都有可能發生。」他強調,假如傑志來年真的如願獲得「亞冠盃」參賽資格,這將會是一個非常具挑戰性的體驗。
來港一年,加維蘭也逐漸適應香港的文化和生活,他透露自去年愉園隊友屠俊翹帶他「打邊爐」過後,他在港不再偏愛吃日本菜和泰國菜。不過他有時還會對日式拉麵念念不忘:「我間中仲會同盧斯安奴出旺角『搵食』,尤其係拉麵!」
作為典型西班牙人,加維蘭當然喜愛「同陽光玩遊戲」。在香港這座擁有壯麗山海景色,又有現代化一面的城市,Manu對此讚嘆不已︰「我好鍾意行山!呢樣嘢對我嚟講好新奇嘅事,以前我喺西班牙從來唔會行山,但嚟咗香港之後,我從來冇想像過會喺山上見到猴子、野豬、野牛等等嘅動物!對我同太太Alba嚟講都係好奇妙嘅經歷。」
疫境中他鄉遇故「親」
因為新冠肺炎疫情,加維蘭原本打算邀請家人年初訪港,以及暑假回國探親的計劃,均一一擱置,令這位29歲鋒將已有近年半時間,闊別身處家鄉的父母,Manu坦言偶爾會感到孤單。不過一件意想不到的事情,竟發生在他的身上,事關一位自稱為Manu遠房親戚的陌生人,有一天竟突然聯絡上他……「有日突然有個人Send咗個訊息嚟話佢識我,佢仲話佢個名叫Nacho Gavilán,同我個姓一樣!之後我問番爸爸,佢先記起原來我有個遠房堂阿哥住喺香港,仲要已經住咗5年咁耐!」自從他鄉遇故「親」之後,加維蘭經常和老婆Alba乘船到訪南丫島探望堂哥,閒時聚一聚,讓他一解思鄉之愁。
加維蘭Profile
全名:Manuel Gavilán Morales
出生日期:1991年7月12日(29歲)
位置:前鋒、翼鋒
球衣號碼:11
現效力球隊:傑志
曾效力球隊:貝迪斯B隊、拉高斯迪拿(西乙B)、博洛尼亞(意甲)、SV列特(奧甲)、愉園(只列部分)