夏薩特回歸！歐聯打救皇馬

《串績王》新登場，最強博彩盤路過關神器：http://win.on.cc/football/　

皇家馬德里公布咗出戰周三(28日)凌晨歐聯分組賽作客慕遜加柏嘅大軍名單，大家見到1位久違嘅熟悉名字，就係夏薩特。呢位比利時國腳已經傷愈，可以隨時候命，對於近期表現走下坡嘅皇馬，絕對係1場及時雨。

夏薩特上年夏天加盟皇馬後，經常受傷，上月因為右腳肌肉受傷，一直缺陣，佢今季仲未為皇馬上陣。

「銀河艦隊」近期亦一度陷低潮，分別於西甲及歐聯不敵卡迪斯、薩克達，好彩上場西甲「國家打吡」擊敗巴塞隆拿，及時止血，依家有埋夏薩特助陣，真係好事成雙。

皇馬首輪歐聯分組賽以2比3輸畀烏克蘭球隊薩克達，餘下分組賽肯定全力搏殺收復失地，睇番皇馬近3次歐聯作客德甲球隊，獲得全勝，所擊敗嘅對手更加係拜仁慕尼黑及多蒙特等勁旅，今場作客慕遜加柏，應該可以打開勝利之門。