數據唔呃人　阿迪達成績差過艾美利

足球博彩神器，每日重心提供盡在《彩報》：http://win.on.cc/football/　

阿仙奴開季3勝3負，3場敗仗係輸畀利物浦、曼城同李斯特城等勁旅，3場勝仗係贏富咸、韋斯咸同錫菲聯等非爭標球隊，可以預計阿仙奴今季成績都係中游附近，英國傳媒再列出阿迪達同前任艾美利數據，發現阿迪達成績唔及前任，大家覺得阿迪達教得好，皆因佢捧咗英足盃同社區盾。

英國《太陽報》報道，阿迪達執教嘅阿仙奴似乎好咗，但實際上係差咗，比較2人各項賽事成績，阿迪達執教頭38場賽事，錄得21勝8和9負，入58球失35球；至於艾美利頭38場成績，就係23勝6和9負，入74球失47球。艾美利比阿迪達勝仗多2場，入球同失球都較多。

如果淨係比較英超，距離再大啲，比較2人執教26場英超賽事，阿迪達取得12勝6和8負，入40球失28球，艾美利就有15勝5和6負，入53球失37球。各項數據反映，阿迪達同艾美利其實差唔多，甚至稍差，分別係艾美利入波較多，阿迪達失波較少。