西布朗未贏過仲要賣主力　比歷喊晒口

《串績王》新登場，最強博彩盤路過關神器：http://win.on.cc/football/　

西布朗噚晚喺英超作客1:1賽和白禮頓，執番1分，開季至今6戰3和3負未贏過，主帥比歷頭都痕，最大鑊後會方日前宣布，埃及中堅希加斯外借到沙特阿拉伯勁旅伊蒂哈德，稍後正式賣斷，搞到比歷笑唔出。

先講噚晚場波，西布朗上半場處於劣勢，40分鐘更有隊長積基李華摩亞救球心切擺烏龍落後0:1，幸好下半場搶番主動，83分鐘由卡蘭格蘭12碼點推順勁射破網扳平1:1完場。

西布朗雖然逃過輸波厄運，但主帥比歷笑唔出，事關球會賽前宣布，29歲埃及中堅希加斯離隊，改投沙特阿拉伯嘅伊蒂哈德，呢位中堅在西布朗效力3年，經歷球隊降班同升班，今季重返英超後，前仗對般尼正選上陣，點知突然離隊。

比歷表示：「希加斯係球隊計劃一部份，我好想佢留隊，而佢亦想繼續為球隊付出，今次轉會真係好突然，係球會嘅決定。」