持續收到死亡恐嚇　比克福特請保鑣

《英超刨績王》加強版，最強數據一網打盡：http://win.on.cc/football/　

自從默西賽德郡打吡結束後，愛華頓門將比克福特及前鋒李察利臣持續收到死亡恐嚇，英國傳媒報道，比克福特有感事態愈嚟愈嚴重，向保安公司求助，聘請私人保鑣保護自己及家人安全。

愛華頓在默郡打吡賽和利物浦2比2，球迷談論最多係門將比克福特出迎攔截華基爾雲迪積克，令後者膝部重創長抖，復出無期，而且球證判決利物浦越位在先，比克福特嘅攔截不但逃過12碼判罰，更冇任何紅黃牌警告。同日李察利臣粗暴攔截堤亞高艾簡達拿領紅牌，同樣導致後者受傷。

比克福特及李察利臣連日來不斷收到死亡恐嚇及網上滋擾，比克福特仔細老婆嫩，感覺生命財產受到威脅，決定聘請保安公司保鑣作24小時保護，保護範圍包括居所、自己、太太及1歲兒子。

除咗請保鑣，專家更提醒受保護人士要注意網上言行，唔好隨便發帖洩露行蹤，當地警方亦已介入調查。