莫拉達喪食3鋪詐胡　祖記吞巴塞隆拿雙蛋

《串績王》新登場，最強博彩盤路過關神器：http://win.on.cc/football/　

周四(29日)凌晨歐聯G組超級大戰，祖雲達斯主場對巴塞隆拿，雖然未能上演C朗拿度同美斯嘅「球王對決」，不過一樣成為焦點。祖雲達斯今場有艾華路莫拉達罕有連食3鋪詐胡，3個入波都被VAR判越位而推翻，最終祖雲達斯亦慘吞巴塞隆拿2蛋。

作客嘅巴塞隆拿今場表現較佳，14分鐘就憑奧士文尼迪比利個人表演後射入。艾華路莫拉達1分鐘後為祖記入波，但因為突出咗半個身位邊判越位，呢位西班牙前鋒喺30分鐘同55分鐘分別再將個送入網，但通通被VAR推翻。祖記尾段仲有中堅美列迪美羅兩黃被逐，補時再輸多個12碼，巴塞隆拿由美斯操刀射成2比0完場。

艾華路莫拉達唔單止係「黑仔王」，亦都係越位王！統計顯示艾華路莫拉達喺2020年曾經18次將個波送入網，但係當中有11球被判詐胡，包括上場意甲1比1打和維羅納都有發生。自上屆歐聯開始到依家，艾華路莫拉達有13次越位紀錄，同迪姆華拿並列歐聯「越位王」。