守護神降臨 車路士豆腐防線變磚頭

20201029
東網電視
更多新聞短片
《英超刨績王》加強版,最強數據一網打盡:http://win.on.cc/football/ 
車路士近2年經常被批評攻強守弱,前面入埋都唔夠後面條「豆腐防線」輸,不過自從塞內加爾門將艾度亞文迪加盟後,車路士防守突然變得固若金湯,周四(29日)凌晨歐聯E組作客4比0大破卡斯洛達後,艾度亞文迪已經連續第4場保持不失球,成為車仔守護神。
卡斯洛達今場有多位主力因確診新冠肺炎而缺陣,面對有薛耶治首度正選嘅車路士完全唔夠踢。車仔14分鐘就有迪姆華拿博到12碼,但佐真奴費路主射宴客,不過37分鐘仍然由赫臣奧杜爾入波開紀錄。下半場卡斯洛達企圖反攻,但後防反面更加空虛,迪姆華拿76分鐘憑12碼入波,3分鐘後薛耶治亦拎到加盟車仔後第1球,加上基斯甸普列錫完場前錦上添花,協助車仔大勝4比0。
車仔門將艾度亞文迪下半場都相當忙碌,曾經用指尖擋出卡斯洛達嘅楣底波,表現非常穩陣,佢喺最近2場英超同2場歐聯賽事都保持不失,而阿列沙巴拿加過去9場歐聯賽事只得1場不失球,艾度亞文迪個正選位置似乎都相當穩陣。