曼聯新兵失蹤之謎解開！原來中咗招

《英超刨績王》加強版，最強數據一網打盡：http://win.on.cc/football/　

曼聯月初向波圖收購嘅左翼衞阿歷士迪尼斯自從首輪歐聯上陣對巴黎聖日耳門之後，就一直唔見人，原來佢確診新冠肺炎，現時正接受隔離。

曼聯領隊蘇斯克查話：「阿歷士迪尼斯會缺陣一段時間，因為佢對新冠肺炎病毒呈陽性反應，但並冇症狀，佢現時情況唔錯，只係未能夠歸隊。」意味阿歷士迪尼斯肯定無緣下周一(11月2日)凌晨英超主場對阿仙奴。

呢位27歲巴西國腳亦喺社交網上報平安：「朋友們，我想感謝你哋嘅慰問訊息，球會已經宣布我確診新冠肺炎，我依家好好，正在隔離，好快就會回歸，盡力幫助隊友，再次多謝大家嘅慰問。」

阿歷士迪尼斯身價達1,540萬鎊，佢喺上季葡超入11球，屬於「帶刀侍衞」。