作嘔都要踢！拉素超殘陣打和布魯日

《英超刨績王》加強版，最強數據一網打盡：http://win.on.cc/football/　

拉素周四(29日)凌晨喺歐聯F組作客布魯日一仗，賽前爆出半隊球員因新冠肺炎影響而未能出戰，結果拉素召入多位青年軍球員「湊數」之下，仍能夠同布魯日踢成1比1平手，教練施蒙尼恩沙基就話「收晒貨」，佢仲大爆有球員頭暈兼作嘔，都要頂硬上落場！

拉素喺王牌前鋒恩莫比尼等12個球員缺陣下，仍然喺14分鐘由祖亞昆哥利亞先開紀錄，可惜柏特歷加巴朗完半場前禁區內魯莽犯規，被布魯日靠12碼追成平手。拉素球員之後明顯氣力不繼，但靠西班牙老將連拿屢救險球，最終都保住1比1和局。

拉素教練施蒙尼恩沙基賽後話：「雖然有千個難題，但球員都付出100%去比賽，最後贏唔到係有啲冇運。呢場波最重要嘅球員表現，我認為佢哋喺咁困難嘅環境下，表現係非常之好。我從來未試過只有12個球員可以用，希望呢個情況以後唔會再出現。」施蒙尼恩沙基更透露，佢半場換走柏特歷加巴朗並唔係因為佢輸12碼，而係因為柏特歷加巴朗覺得作嘔同頭暈。