國家英雄冇面畀!科蘭執教9日閃電被炒

2020年10月29日 19:30
東網電視
更多新聞短片
足球博彩神器,每日重心提供盡在《彩報》:http://win.on.cc/football/ 
世界盃金靴又點?踢得唔代表識得教波!幾年前加盟過傑志嘅前烏拉圭國腳科蘭,今年初執教鞭,成為當地名門彭拿路主帥,估唔到上任只係短短9日時間,已經立刻被炒魷,事後佢都話唔明白為乜咁快畀人兜咗。
科蘭係喺8月下旬接掌彭拿路,8月31日領軍主場出戰蒙得維的亞流浪者輸0比2之後,球會馬上派大信封畀佢。以當時形勢嚟講,彭拿路贏到的話,確實可以追到只差榜首1分,輸波當然唔係個理想戰果。問題係,彭拿路仲未至於冇得爭,自由盃亦有機會進軍16強,做乜咁快炒咗櫈都未坐暖嘅烏拉圭足球Icon科蘭呢?
事隔兩個月後,科蘭第一次喺電視節目講起呢件事,連佢都話唔明原因,究竟係咪人事上出咗問題,彭拿路管理層秘而不宣,打死都唔肯解釋。呢位前曼聯、馬體會、國際米蘭同維拉利爾球員,只能夠咁樣猜測母會嘅無情:「足球同網球、田徑甚至籃球都好唔同,呢啲項目你夠強就贏到對手。足球唔同,優勝劣敗在於入波結果,人哋踢得差偏偏入到波,你踢得好但就浪費晒,嗰場波嘅賽果令我要起身走人。」足球難免賽果掛帥,科蘭冇得好怨,只能夠怪自己道行未夠。只不過一場定生死,彭拿路似乎又係急咗啲。