韓職悲劇！FC首爾後衞金南春離奇死亡

《串績王》新登場，最強博彩盤路過關神器：http://win.on.cc/football/　

FC首爾主力後衞金南春今早被發現倒斃喺屋企門外停車場，事件震驚韓職足球界，警方正調查佢嘅死亡原因，據報案件不涉及謀殺，有傳媒懷疑係一宗自殺悲劇。

首爾松坡區警局一名負責人透露，周五早上8時20分左右，金南春嘅屍體喺屋企門外停車場，被一名物業管理人員發現，警方正進一步調查金南春生前活動軌跡，以確定死亡細節，暫時相信與刑事罪案無關，呢位31歲後衞可能係自尋短見，但未發現遺書，FC首爾隨後亦確認其喪生消息，韓職官方Facebook都發圖悼念。

金南春喺朝鮮文化大學畢業後，2013年起喺FC首爾展開職業足球生涯至今，除咗中途因服兵役加盟尚州尚武，一直都係呢支首都球隊嘅骨幹，更加係2015年韓足盃、2016年嘅聯賽冠軍功臣，同南韓名將朴主永合作咗5年。金南春喺K聯賽總共上陣114場，貢獻4個入球同2次助攻。今季披甲22場嘅佢，剛剛先同首爾續約3年，事業順遂，突然撒手人寰令外界錯愕。

FC首爾周六（31日）將會主場出戰仁川聯，踢今季聯賽謝幕戰。