高普出手！利物浦冬季搶簽阿拉巴

《英超刨績王》加強版，最強數據一網打盡：http://win.on.cc/football/　

利物浦中堅華基爾雲迪積克受重傷之後，連頂替佢位置嘅法賓奴泰華利斯日前都傷埋，令領隊高普非常頭痛，明年1月冬季轉會市場重開，簽入中堅刻不容緩。英國傳媒爆料，指高普睇中拜仁慕尼黑「全能後衞」阿拉巴，力爭收購佢。

由於阿拉巴遲遲唔肯同拜仁慕尼黑續約，據悉雙方一直就人工問題未能達成協議，由於呢位28歲奧地利國腳將於明夏約滿，明年1月可以同其他球會傾加盟問題，拜仁慕尼黑為免人財兩失，可能被逼明年1月提早出售佢，利物浦就有機可乘。

阿拉巴16歲已經加盟拜仁，至今上陣過393次，射入31球及49次助攻，佢可以勝任中堅、左閘、防中，同法賓奴泰華利斯一樣都係「全能後衞」，曾經有傳曼聯都想簽佢，但高普喺德甲有廣闊人脈，有望捷足先登。