夏神開齋賓施馬起孖　皇馬大勝

《串績王》新登場，最強博彩盤路過關神器：http://win.on.cc/football/　

皇家馬德里周六早場出擊，主場以4:1大勝升班球隊侯爾斯卡，夏薩特踢正選開紀錄，亦係佢今季開齋入波，新聞多多嘅賓施馬梅開二度，費達歷高華維迪1入球1助攻，為下周歐聯生死戰對國際米蘭一壯行色。

歐聯首2仗1和1負陷於不利局面，皇馬今仗輪換陣容，夏薩特、莫迪歷、馬些路及艾達米列達奧踢正選，夏神不負所托，上半場40分鐘離門25碼左腳腳背抽射世界波破網，今季順利開齋。

賓施馬上仗歐聯被爆內訌，指佢拒絕交波畀隊友雲尼斯奧斯祖利亞，但並無影響今仗表現，完半場前擴大比數至2:0，54分鐘費達歷高華維迪繼上周國家打吡後再入波成3:0遙遙領先。

其後皇馬由雲尼斯奧斯祖利亞入替夏薩特，佢都有交波畀賓施馬，但後者大腳施射高出，74分鐘客隊由大衛費利奴破蛋，但無損大局，補時期間施賓馬接應洛迪高高斯傳送成功起孖，皇馬贏4:1完場。