肥安又出招！搵艾斯高拍住J神

《串績王》新登場，最強博彩盤路過關神器：http://win.on.cc/football/　

愛華頓領隊安察洛堤今夏簽入皇馬中場占士洛迪古斯，效果非常理想，英國傳媒指「肥安」準備明年1月冬季轉會市場重開後，再次向皇馬挖角，今次想簽入艾斯高。

英國《鏡報》指皇馬將於明年1月大清洗，包括出售艾斯高等多位後備球員。現年28歲嘅艾斯高今季只係踢咗180分鐘，早前西甲對巴塞隆拿，佢向隊友抱怨自己不受重用，呢一幕畀鏡頭影到，肯定激嬲教練施丹，勢必成為被清洗頭號人物。

據悉，皇馬願意將艾斯高外借，對方球會可以喺明夏用1,800萬鎊買斷呢位西班牙國腳。安察洛堤2013至15年執教皇馬期間，艾斯高有出色表現，該2季上陣96場入11球。「肥安」至今仍然非常欣賞佢，艾斯高亦認為轉投愛華頓，可以獲得重用，雙方眉來眼去。

愛華頓喺周日(1日)晚英超作客1比2不敵紐卡素之後，近3場聯賽只有1和2負，安察洛堤更加需要喺明年1月增兵，如果艾斯高真係可以再次同占士洛迪古斯拍住上，愛華頓今季一定好有睇頭。