奧雲睇好卡雲尼：早十年佢入過百球

《英超刨績王》加強版，最強數據一網打盡：http://win.on.cc/football/　

卡雲尼加盟曼聯終於喺上場對愛華頓開齋，魔迷都好高興，英超名宿奧雲更認為，如果卡雲尼能夠效力仲係由費格遜領軍嘅曼聯，佢可以入過百球。

由於卡雲尼喺巴黎聖日耳門長期坐冷板，長時間冇比賽，轉會曼聯後仲需要時間操起狀態，因此暫時安排做後備，上場對愛華頓佢同樣後備上陣，結果臨完場射入1球，而呢個入球得到奧雲大力讚賞。

奧雲好欣賞卡雲尼嘅入波方式：「喺射門方面，我特別鍾意瞄準起腳，而唔係大腳抽射，當時卡雲尼展開身體，用假動作作勢要射遠柱，用眼神迷惑門將，然後擺腿轉向，將個波射入近柱。」

奧雲繼續話：「我留意咗呢個球員好多年，當個波飛入禁區，好似佢咁走位嘅球員唔係太多，如果喺我嗰個年代嘅曼聯，佢可以攻入過百球，至於依家，就要視乎曼聯能否畀到足夠嘅供應畀佢。」