民間足球先生！羅拔仔拎「Lego金球獎」

《串績王》新登場，最強博彩盤路過關神器：http://win.on.cc/football/　

波蘭前鋒羅拔利雲度夫斯基上季演出神勇，帶領拜仁慕尼黑橫掃歐聯同德甲，早被公認為金球獎唯一人選，點知一場新冠肺炎疫情搞亂球壇，連金球獎選舉都要停辦，令羅拔利雲度夫斯基錯失贏取呢項球員最高個人榮譽嘅機會。

有見及此，波蘭著名歌手Quebonafide就自己用Lego砌咗一個金球獎獎座，並且親自拎去送畀呢個國家隊神鋒。羅拔利雲度夫斯基日前就喺社交網Po出合照，多謝Quebonafide咁有心機砌呢個「偉大獎盃」。

羅拔利雲度夫斯基同Lego特別有緣，4年前喺華沙嘅國家足球場外，就有一個用7萬塊Lego砌出嚟嘅「羅拔仔」模型展出。波蘭周四(12日)凌晨熱身賽主場對烏克蘭，據報羅拔利雲度夫斯基可能會休息，留力之後歐國聯對意大利同荷蘭。