紅軍噩耗　連祖高美斯都傷埋

足球博彩神器，每日重心提供盡在《彩報》：http://win.on.cc/football/　

利物浦今季防線流年不利，繼華基爾雲迪積克、法賓奴泰華利斯及阿歷山大阿諾特之後，中堅祖高美斯喺當地時間周三（11日）早上嘅英格蘭國家隊操練時受傷，多間英國傳媒均以「嚴重受傷」報道，看來傷勢非輕。英格蘭領隊修夫基較後時間相信會交代詳細情況，不過預計祖高美斯肯定唔可以喺周五凌晨對愛爾蘭嘅熱身賽、與及未來2場歐國聯為英格蘭上陣。

利物浦較早時間先有荷蘭中堅華基爾雲迪積克喺默西賽德郡打吡受傷提早收咧，原本諗住做替工嘅法賓奴泰華利斯又喺歐聯對米迪蘭特傷出，之後輪到右閘阿歷山大阿諾特喺上場聯賽對曼城「打柴」，最少休息4星期，如果祖高美斯都要長抖，上季幫利物浦贏得聯賽冠軍嘅正選4人防線，目前只有左閘安德魯羅拔臣冇事，領隊高普肯定嗌晒救命。