卻奧斯開火插奧巴美揚　奧斯爾撐邊個？

足球博彩神器，每日重心提供盡在《彩報》：http://win.on.cc/football/　

皇家馬德里中場卻奧斯，日前接受德國傳媒訪問，無端端向基沙文同奧巴美揚開火，指佢哋嘅慶祝入波動作(遊戲手勢、戴面具)勁無畏，唔配做年輕球員嘅模範，而矛頭更主要指向奧巴美揚。對於自己無啦啦被插，奧巴美揚隨即回應：「呢個真係卻奧斯本人？我唔知佢有冇仔女，我為我嘅兒子做過幾次(面具慶祝)，之後都會再做，希望你他日都有仔女，一樣可以令佢哋開心。」奧巴美揚再轉貼2張來自英國小學嘅相片，相入面小學生交出一份以「快樂」為主題嘅勞作，而作品正正就係奧巴美揚畫像。奧巴美揚表示選擇戴面具慶祝，只為帶畀細路快樂。

聽到奧巴美揚解釋，卻奧斯只係回覆自己都有3個仔女，但就冇為自己嘅評論作出回應。不過，作為卻奧斯前德國國家隊隊友嘅奧斯爾，就選擇企喺奧巴美揚嗰邊，佢喺twitter貼出奧巴美揚戴黑豹面具慶祝片段，留言話：「最佳慶祝！」寸爆反擊卻奧斯。