法明奴踢國家隊特別醒 巴西贏波全勝

20201114
東網電視
更多新聞短片
《串績王》新登場,最強博彩盤路過關神器:http://win.on.cc/football/ 
周六(14日)早上世界盃外圍賽南美洲區賽事,巴西主場面對頑強防守嘅委內瑞拉,幾經辛苦之下小勝1比0,羅拔圖法明奴延續喺國家隊嘅醒神表現,今場一箭定江山成為贏波英雄。
巴西今場喺尼馬受傷缺陣下,排出一氣全英超鋒線,由羅拔圖法明奴、李察利臣同加比爾捷西斯組成三叉戟,但估唔到面對弱旅委內瑞拉都踢得咁辛苦。李察利臣開波6分鐘已送個波入網,但被判越位而食詐胡;40分鐘巴西後衛雷蘭洛迪入波,又被指犯規在先而無效。巴西攻到67分鐘先至由羅拔圖法明奴攻入全場唯一入波,驚險拎晒3分,喺世盃外3戰全勝排南美洲區榜首。
羅拔圖法明奴今季喺利物浦表現受到批評,尤其係入球率極低,今季12場利物浦比賽只入過1球,唔少球迷都話想迪亞高祖達取代佢嘅正選位置。不過,羅拔圖法明奴返到巴西國家隊就特別醒神,今場係佢今屆3場外圍賽入嘅第3球,下輪大戰烏拉圭唔知有冇機會再入波呢?