烏拉圭撼巴西激演入球騷

2020年11月17日 21:30
東網電視
更多新聞短片
世盃南美洲區外圍賽,烏拉圭主場迎戰榜首「1哥」巴西。兩隊狀態都唔錯,尤其烏拉圭重召卡雲尼,呢名曼聯前鋒即刻交到貨,上場入波助球隊大捷;巴西前線人材鼎盛,冇尼馬都唔怕,預料雙方力求3分都會搶攻,捧2.5球入球大。(周三早上7時開賽)
主場出擊嘅烏拉圭,今輪國際賽重召曼聯前鋒卡雲尼,呢位老牌射手上場踢咗5分鐘就打開紀錄,助烏拉圭以3比0作客擊敗哥倫比亞,全取3分排南美洲區第4。雖然烏拉圭全場控球率只得37%,但就以效率取勝,6射4中入3球,烏拉圭把握力確實犀利。事實上,烏拉圭近5場全開3球或以上,對住巴西亦唔係冇得踢。
巴西英超3寶有料到
巴西本來有徵召球星尼馬,但佢因為受傷,上場鬥委內瑞拉已經缺陣,今場亦唔會復出。不過,巴西陣中有大量實力派球員,前線有「英超3寶」羅拔圖法明奴、李察利臣及加比爾捷西斯,上場亦憑法明奴一戰定江山小勝委內瑞拉,呢位利物浦前鋒於巴西3場世盃外入3球,尼馬缺陣影響亦不大。
再者,巴西上場仲打起咗里昂中場盧卡斯柏基達,呢位被AC米蘭放棄嘅球員,中場傳出一腳靚直線畀隊友,輾轉畀法明奴入波,預料佢今場會搶到正選,難得有表演身價機會,盧卡斯柏基達肯定施展渾身解數助巴西贏波。巴西以往鬥烏拉圭獲5勝1和,心理上佔優,預料今場作客亦會照攻,同烏拉圭上演入球騷。