英超賽會知衰　榜首戰VAR球證換人

足球博彩神器，每日重心提供盡在《彩報》：http://win.on.cc/football/　

本周英超重開立即上演榜首大戰，利物浦主場迎戰李斯特城，英國傳媒報道，賽前突然出現裁判更換安排，原定VAR球證古特(David Coote)被換走，改去執法曼聯對西布朗，該場榜首戰嘅VAR就由其他球證負責。

古特之所以被換走，皆因佢就係上月默西賽德郡打吡戰嘅VAR球證，該場賽事古特嘅「所作所為」受到紅軍球迷猛烈批評，例如華基爾雲迪積克遭比克福特攔截嚴重受傷，賽事未段佐敦軒達臣絕殺變詐胡等等，都令人非常勞氣，甚至主帥高普都暴跳如雷。

對愛華頓一仗搞到天怒人怨，早前公布今次對李斯特城，又係古特做VAR球證，紅軍球迷立即發動網上攻勢，大肆抨擊今次安排，擔心佢今次又唔知累邊個紅軍球員收咧，又唔知邊個入波食詐胡，終於英超賽會「買佢怕」，另一角度睇係佢哋知衰，索性改由其他球證「睇電視」，以免再有爭拗。