【有片】內亂升級 美斯球迷攔車怒轟基沙文

2020年11月21日 09:03
東網電視
更多新聞短片
《串績王》新登場,最強博彩盤路過關神器:http://win.on.cc/football/ 
巴塞隆拿內亂升級!法國前鋒基沙文陣營近日向美斯開火,佢阿叔同經理人先後批評美斯喺巴塞隆拿享有特權,搞到「球王」日前扯火反擊,話已經厭倦自己被塑造成巴塞隆拿問題嘅根源。美斯一出聲,一眾球迷梗係第一時間聲援,部份球迷日前嘅喺巴塞隆拿訓練場外「埋伏」,等基沙文離開嗰陣攔車喪鬧,叫佢要「畀啲尊重美斯」。
據西班牙《GOL》嘅影片所見,基沙文揸車離開訓練場嗰陣,有幾名美斯球迷即刻衝上去企圖攔車,甚至有人挨住車窗要求同基沙文對話,期間有人不斷大叫「尊重美斯、尊重美斯」,明顯係針對基沙文陣營近日惹火言論而嚟。
基沙文個阿叔早前表示,巴塞隆拿嘅訓練係為美斯而設計,令佢唔需要太落力都可以「好似」表現好好;經理人富達亦表示巴塞隆拿只有美斯話事。不過,唔少網民都話戥基沙文唔抵,因為呢位法國前鋒全程都冇出過聲,只係佢身邊人出嚟講嘢,美斯球迷將怒火指向基沙文係唔啱道理。
巴塞隆拿教練朗奴高文就想淡化事件,被問到美斯同基沙文嘅不和,佢話:「我明白美斯點解咁嬲,佢坐完長途機返嚟就被問基沙文嘅問題,畀著我都會嬲,佢應該得到更多尊重。其實所有問題都係傳媒製造出嚟,我睇唔到佢哋之間有任何問題」