港超聯 東方龍獅10人應戰照炒晉峰

20201121
東網電視
更多新聞短片
(林卓臻攝)
千呼萬喚的「中銀人壽香港超級聯賽」於周六(21日)在旺角大球場掀起新一季的戰幔,由東方龍獅在主場迎戰港超新軍晉峰。東方龍獅雖然大部分時間少踢一人,但憑辛祖及盧卡斯的梅開二度,加上艾華頓的入球,以5比0懸殊比數輕取港超新軍晉峰,用一場大勝為聯賽征途揭開序幕。
粉紅色衫的晉峰開局就採取主動,2分鐘費利浦薩禁區內窄角度勁射,被葉鴻輝接實。9分鐘,晉峰隊長廖億誠打到利馬「荷包」,突破後推大位施射,惟角度欠奉未能造成威脅,1分鐘後費利浦薩右路突破傳球給黃偉國,但射門無力。其後東方龍獅逐漸站穩陣腳,15分鐘,辛祖禁區外傳球給盧卡斯,後者射門僅僅斜出。21分鐘,辛祖高波吊入禁區,盧卡斯窩利抽射中柱彈出。第一入球出現在29分鐘,鍾俊濠在禁區內剷跌辛祖被判罰12碼,後者親自操刀射入,是為本季聯賽的首個入球,東方龍獅領先1比0。32分鐘,陳浩瑋踩到晉峰何浚皓,被球證直接出示紅牌驅逐離場,但踢少一個東方龍獅火力無減,40分鐘更憑盧卡斯接應黃威右路角球,在門前頂入,拉開領先優勢至2比0入更衣室。
換邊後,10人應戰的東方龍獅49分鐘獲得12碼,由盧卡斯冷靜射入,擴大比數至3比0。晉峰未有輕言放棄,攻勢不斷希望能夠「破蛋」,52分鐘由廖億誠開出角球到禁區頂但未能傳到隊友腳下,未能把握場上人數優勢之餘,反而被東方龍獅把握後防漏洞。58分鐘東方龍獅換入另一王牌艾華頓,希望穩定勝局。3分鐘後,後備入替的鍾偉強頭鎚攻門中楣,艾華頓伏兵門前頂入,東方龍獅贏到4比0。79分鐘,黃梓浩斜線傳球予艾華頓,後者落底傳給辛祖輕鬆射入,為東方龍獅奠定5比0勝局,在現場915位球迷見證下,聯賽首戰全取3分。
東方龍獅上半場一度因陳浩瑋紅牌被逐踢少一人,賽後總監兼主教練李志堅,承認當時形勢一度陷入被動,但慶幸球隊在人數變少之前先取得領先優勢,亦不忘稱讚對手早段的進取態度:「我覺得(晉峰)都好壓迫性,當然我哋經驗好啲,站穩陣腳後我哋可以攞返個控制權,呢個係關鍵。」他對球隊可以忠於自己的部署感到滿意:「喺穩定勝局之後,俾啲受傷嘅球員出嚟攞番下狀態,呢嗰係我最滿足嗰地方。」
李志堅亦希望球隊能夠維持強勢表現:「聯賽我哋係冇空間嘅,對住任何對手都希望會可以做到唔失分。」近日本港疫情有反彈趨勢,聯賽開幕戰當日確診及初步確診數字再次飆升,李志堅坦言對疫情趨勢感到擔憂:「社會嘅情況係直接影響到球迷入場,姑勿論係唔係可以畀你入場都好,希望球迷都會好好保護自己。」
晉峰總教練何信賢則承認球隊未能發揮好賽前部署,尤其在防守死球上表現令人失望:「輸第一球後我哋嘅部署都係攻嘅,對咁強嘅對手死守都唔係一個辦法,所以我哋選擇進攻,但奈何先輸一球12碼,再輸死球,我哋練咗防守死球成個禮拜,不過都係失敗咗。」晉峰上半場兩次獲得入球黃金機會,可惜都未能好好把握,何信賢覺得球員在獲得機會時準備不足,更認為隊員在信心上開始動搖。
何信賢在接受訪問時一度哽咽,最後不忘多謝球迷入場支持:「多謝啲球迷,我哋聽到好多鼓勵嘅聲音,如果冇咗佢哋,呢班年青球員會進步好慢,就算俾人學到彩都係一個進步嘅機會,希望繼續努力。」