敗家華拿助攻補數 車仔劏「鵲」5連勝

2020年11月21日 22:23
東網電視
更多新聞短片
《英超刨績王》加強版,最強數據一網打盡:http://win.on.cc/football/ 
周六晚(21日)英超頭場,雖然車路士前鋒迪姆華拿腳風欠佳兼食埋詐胡,但佢亦交出助攻,協助車仔作客輕取紐卡素2比0,各項賽事豪取5連勝,弗到漏油。
車仔一開波即刻撳住嚟攻,先有迪姆華拿殺入禁區窄位抽射,被紐卡素門神卡爾達路僅僅封出,冇耐輪到弗到爆嘅薛耶治於右路傳中,箭頭「譚仔」譚美阿巴謙近門一頂,又過唔到卡爾達路十指關。去到10分鐘,車仔嘅美臣蒙特於右路落底線,「喜鵲」中堅費達歷高費南迪斯畀芝維爾壓迫下,用右腳解圍點知踢番落自己左腳彈入網,咁樣擺烏龍令車仔先開紀錄,其後迪姆華拿接應「譚仔」妙傳快射竟然出界。
下半場車仔依然得勢不饒人,迪姆華拿藉住對手犯錯偷到個波,但佢單刀橫傳又唔夠力,畀主隊及時閂出。去到65分鐘,華拿終於做番齣好戲,一次快速反擊從後場狂推,令紐卡素後衞食晒塵,之後佢妙傳空晒嘅「譚仔」掃入,拉開比數。其後薛耶治一次靚斜線,畀華拿過埋卡爾達路拗腰射入,可惜佢越位在先食鋪詐胡,雖然呢位德國國腳今仗食白果,但佢今季加盟車仔,13次上陣已入8球及貢獻3次助攻,睇嚟主帥林柏特已搵到「華拿說明書」,最終車仔贏2比0,聯賽連盃賽連贏5場,氣勢如虹。