摩二季效應!熱刺破「城」升榜首

2020年11月22日 08:02
東網電視
更多新聞短片
(Getty Images)
《英超刨績王》加強版,最強數據一網打盡:http://win.on.cc/football/ 
周日(22日)凌晨英超大戰,熱刺憑孫興民、盧施素各入1球,主場以2比0擊敗曼城,並趁李斯特城對利物浦之前,殺上榜首。熱刺主帥摩連奴以往第2季領軍,往往有冠軍落袋,「摩二季效應」今季又發揮威力。
開波僅5分鐘,熱刺就打開紀錄,尼當比利長傳,孫興民一控一射入網,非常瀟灑。踢到27分鐘,曼城原本有機會扳平,當時馬列斯右路傳中,加比爾捷西斯喺禁區內控定,再傳畀拿樸迪射入。不過,球證睇完VAR之後,吹罰加比爾捷西斯控球時犯手球,判入球無效。
熱刺避過一劫,下半場果然有後福,再次用反擊戰術入波,哈利卡尼妙傳畀盧施素射成2比0,以2分優勢,力壓踢少1場嘅李斯特城,升上榜首。如果李城喺周一(23日)凌晨作客失分畀利物浦,熱刺就可以坐穩一哥位置。
今場波亦係熱刺領隊摩連奴教波生涯,第24次同曼城主帥哥迪奧拿交手,雖然「寸王」只取得7勝6和11負,但佢近2次鬥哥帥,都成功勝出,反佔上風。
值得一提, 「摩二季效應」又再出現,摩連奴出道初期,執教波圖第2季奪得葡超冠軍,展開名帥生涯,執教國際米蘭第2季,更加協助球隊成為三冠王。「寸王」執教皇馬以及回巢車路士,都係第2季捧聯賽冠軍,今季有望率領熱刺首嘗英超冠軍滋味。