巴塞災難式輸波！碧基重傷長抖6個月

《串績王》新登場，最強博彩盤路過關神器：http://win.on.cc/football/　

巴塞隆拿遭遇今季最慘烈敗仗，唔止作客0比1不敵馬德里體育會，更加有中堅碧基喺比賽中受重傷，預料需要休息6個月，加上另外2位中堅養傷，令教練朗奴高文面臨冇中堅用嘅困境。

今場踢到上半場補時，巴塞隆拿犯下低級錯誤，當時碧基喺前場右路控球甩腳，馬體會球員安祖哥利亞截到波之後，立即大腳長傳，巴塞後半場一面空虛，門將達史特根衝出禁區想解圍，反而被恩歷克卡拉斯高扭過射入空門。

下半場巴塞禍不單行，佐迪艾巴踢跌對手安祖哥利亞，後者落地時，壓到碧基右腳變形，呢位33歲西班牙國腳立即退下火線。根據西班牙《每日體育報》報道，經過初步檢查後，碧基膝部傷勢嚴重，可能需要抖4至6個月。

由於烏姆迪迪、朗奴阿拿奧祖都有傷在身，巴塞現時只有基文迪朗格勒1位中堅可用，朗奴高文嚟緊可能要用防守中場法蘭基迪莊客串踢中堅。巴塞隆拿今季8場聯賽只有11分，創下球隊近25年最差開季成績。