皇馬又失12碼　夏薩特復出都冇用

足球博彩神器，每日重心提供盡在《彩報》：http://win.on.cc/football/　

巴塞隆拿喺西甲輸波，死敵皇馬亦唔好得去邊，今場又被判罰12碼，作客遭維拉利爾逼和1比1，連續2場聯賽失分。皇馬近2場西甲合共被吹罰4球12碼，防線球員認真魯莽，就算球星夏薩特今場復出，都無補於事。

今場開波僅2分鐘，皇馬就由馬里安奴戴亞斯頂入打開紀錄，但踢到76分鐘，皇馬門將泰拔高圖爾斯喺禁區內撲跌對手，被吹罰12碼，維拉利爾由謝拉特摩蘭奴射入扳平。

皇馬防守差之外，進攻亦冇乜建樹，早前確診新冠肺炎嘅夏薩特，雖然已經痊愈，並喺今場復出踢正選，但佢踢咗65分鐘，連1次射門都冇，亦冇創造入波機會，最大「亮點」係5次犯規。加上隊長沙治奧拉莫斯養傷之下，皇馬嚟緊日子好難捱。