C朗助祖記升做二哥 個人總入球直迫比利 

2020年11月22日 16:16
東網電視
更多新聞短片
足球博彩神器,每日重心提供盡在《彩報》:http://win.on.cc/football/ 
葡萄牙球星C朗拿度周六喺意甲繼續成為男主角,協助祖雲達斯主場以2比0擊敗卡利亞里,個人包辦兩個入球,兼帶領球隊升上聯賽榜次位,同時亦刷新生涯入球紀錄。
C朗喺上半場4分鐘內連入兩球,為球隊奠定勝局,目前祖記8戰4勝4和升上排名榜第二,僅以1分落後AC米蘭。C朗嘅兩個入波再為自己的生涯總入球數增至748球,超越匈牙利已故球星普斯卡斯(746球),登上足球史上入球最多排名榜第4位,距離第3位嘅球王比利(757球)僅落後19球,而巴西另一名宿羅馬里奧則以772球保持次席,史上最多入球紀錄仍由捷克已故球星比簡,以805球所保持。
此外,C朗嘅兩個入球亦突破咗60大關,佢轉會祖記之後,喺意甲踢69場射入60粒,超越咗「大哨」朗拿度嘅58球成績,係同期意甲入波最多嘅球員。
仲有就係C朗今季喺意甲出戰五場,全部都有波入,亦係自94至95年賽季改為3分制以來,成為祖記首位喺賽季前五場聯賽都有波入嘅球員,而隨着佢射入意甲60球,C朗亦成為首個喺意甲、英超同埋西甲都入60+嘅球員;而C朗喺英超嘅時候共射入84球,西甲則有311球。