港超聯　硬碰硬！傑志和理文2比2

「中銀人壽香港超級聯賽」周日（22日）激戰連場，尾場於旺角大球場上演傑志火併理文的大戰。兩軍今季於「菁英盃」交手已火藥味十足，今場聯賽「打真軍」，場上火爆程度更加熾熱。傑志雖憑安永佳及李毅凱各建一功帶着領先優勢入更衣室，但理文亦有沙普夫及亞哥斯達兩度扳平，最終雙方打成2比2，今季3次碰頭都未能分出勝負。

開局理文頻頻於進攻左路靠基華尼頓發難，向傑志後防壓迫，但攻勢未算入肉。12分鐘，基爾頓中路突破後傳給安永佳，後者得球後推入大位起腳，可惜射得太正被陳嘉豪救出。26分鐘傑志再接再厲，理文黃俊皓在基爾頓壓迫下後場控球失誤，安永佳得球後，今次沒有浪費黃金機會，射近柱彈入，為傑志領先1比0。

傑志領先不足5分鐘，顏樂楓傳直線給梁嘉恆，後者殺入禁區被傑志守將艾里奧在禁區內鏟跌，球證直指12碼點，沙普夫主射被王振鵬撲出，好在自己頭槌補中，為理文追成1比1平手。41分鐘，陳晉一在禁區頂射門，但省中人改變方向，輕鬆被陳嘉豪接實。上半場補時3分鐘，後上的李毅凱在無人防守的情況下，接應基爾頓開出的罰球撞入，傑志再度領先2比1完半場。

易邊後雙方繼續拉鋸，47分鐘基華尼頓禁區內窄位射門，未有考驗到王振鵬。50分鐘，全場比賽被傑志球員貼身防守的亞哥斯達接應隊友傳送，在禁區頂冷靜射入，理文扳回一城2比2。58分鐘，傑志獲得罰球機會，由基爾頓開出，被門將接實。61分鐘，李毅凱一記冷箭，可惜太正未能威脅理文門將陳嘉豪。其後理文換入法國射手尼迪利及李康廉加強進攻， 傑志亦派出彭林林及何振廷，希望加強前場創造力，85分鐘，陳晉一左路搶贏曾錦濤後傳入禁區，後備入替的何振廷半傳半射皮球劃滑門而過。最終雙方都未能再取得入球，在破今年入場人數紀錄的1775名球迷見證下，以2比2完場各得1分。

早前「菁英盃」期間屢有斬獲的傑志前鋒安永佳，今場再為球隊建功，賽後他坦言入球有助進一步加強自信心：「有入球係好好嘅事令到我更加有自信，我會努力咁去練波，練習臨門最後一腳，我好開心今日有入球，但最緊要嘅係幫球隊贏波。」傑志總監兼主教練朱志光，則希望對陣中年輕球員繼續取得進步：「我哋今年啲球員就年輕咗，打開個出場陣容，我哋26歲多啲，球會做到年輕化，係向着個好嘅方向。但年輕球員比賽，有好有唔好啦，佢可能力氣會好啲，攻守轉換會做得好，但有勇都要有謀，但今日嘅鬥志好好，有犯錯但係都要去包容佢哋。」

賽後理文隊長顏樂楓，認為球隊成功在進攻端取得優勢：「賽前我都講，我哋要喺進攻度攞到更大嘅優勢，我覺得OK嘅，始終上兩次我哋入唔到佢哋波，今次有兩個入球，所以我覺得係做到。」今場兩隊埋身肉搏場面不斷，球證全場亦出示14張黃牌，顏樂楓認為場上球員的情緒更多源於球證的判決：「我覺得所有情緒未必係由上場帶落嚟，係球場上嘅一啲判決，令球員之間多咗磨擦，呢啲問題唔一定係喺球員身上引發，而呢啲問題成日都會喺比賽發生。」理文主教練陳曉明則認為從比賽內容來看，雙方最終打成2比2是合理戰果：「今日我哋覺得自己有少少少林足球feel，當然希望贏到，下半場都解決咗上半場嘅一啲唔好，今日有兩個球員傷出，變咗我哋嘅換人限制，做唔到啲變化，但都睇到我哋球隊係比以往更強大。」