西媒爆利物浦想簽拉莫斯 利迷咩反應?

20201124
東網電視
更多新聞短片
《英超刨績王》加強版,最強數據一網打盡:http://win.on.cc/football/ 
利物浦今季出現嚴重傷兵潮,尤其中堅位置兩位正選華基爾雲迪積克同祖高美斯先後重傷,1月買新中堅似乎係「紅軍」當務之急,烏柏美卡奴、奧辛卡巴克等都係熱門人選,不過西班牙《阿斯報》就爆出驚人消息,話效力皇家馬德里嘅「利迷公敵」沙治奧拉莫斯,竟然都係候選目標之一!
現年34歲沙治奧拉莫斯同皇馬合約只剩唔夠1年,近期已經出現唔少離隊傳聞,包括巴黎聖日耳門都對佢虎視眈眈,雖然沙治奧拉莫斯嘅級數完全配得起利物浦,不過佢喺2018年歐聯決賽「摔角式」撻傷穆罕默德沙拿後捧盃,就令全球利迷記恨至今,如果沙治奧拉莫斯最後披起利物浦波衫,叫利迷情何以堪?
對於西班牙媒體嘅爆料,大部份利迷都係一笑置之,利物浦80年代蘇格蘭名宿尼高亦表示:「利物浦首選應該係烏柏美卡奴呢啲後生球員,佢可以成為未來10年主力,如果簽唔到先至要退而求其次,最理想梗係簽年輕人,除非係有好急切需要先至會簽老將,我認為沙治奧拉莫斯已經走緊下坡。」