C朗面前懶有型？祖雲達斯反勝晉級

《英超刨績王》加強版，最強數據一網打盡：http://win.on.cc/football/　

周三(25日)凌晨歐聯G組賽事，祖雲達斯主場迎戰匈牙利球會費倫斯華路士，原本被視為強弱懸殊比賽，但祖雲達斯最後只係靠補時階段絕殺險勝，C朗拿度今場拎到個人今屆歐聯第1個入球，亦係佢連續第15季喺歐聯入波。

祖雲達斯今場贏得辛苦，19分鐘被費倫斯華路士打反擊，遭奧蘇尼近門攻入，呢位阿爾巴尼亞前鋒入波之後，居然做出C朗拿度招牌嘅「Siiuu」慶祝動作。C朗喺主場畀對手踩上面，當然要還以顏色，雖然先有入波食詐胡，但35分鐘禁區外勁射成功追平，呢球亦係佢歐聯第70個主場入球，追平美斯保持嘅紀錄。費倫斯華路士亦係C朗喺歐聯攻破嘅第34間球會，僅次於美斯嘅36間。祖雲達斯追和之後久攻不下，要到補時2分鐘先至由後備上陣嘅艾華路莫拉達頭槌絕殺。

祖雲達斯贏波後4戰得9分排G組次名，差榜首巴塞隆拿3分，但另外兩隊都只有1分，祖雲達斯得以提早出線。