【有片】53.7碼超級金球!熱刺大勝出線在望

2020年11月27日 09:00
東網電視
更多新聞短片
哈利雲克斯入球:https://bit.ly/33hvJ79 
足球博彩神器,每日重心提供盡在《彩報》:http://win.on.cc/football/ 
周五(27日)凌晨歐霸盃J組賽事,熱刺主場出擊4比0大破盧多格德斯,目前同安特衛普一樣4戰得9分,領先第3位嘅寧斯3位,熱刺下場作客寧斯只要唔輸就可以提前出線。熱刺中場哈利雲克斯今場炮製途程長達53.7碼嘅驚天金球,睇到球迷O晒嘴。
熱刺今場畀哈利卡尼同孫興民等主力休息,不過一班副選都遊刃有餘,卡路士雲尼斯奧斯上半場已經連入2球;去到63分鐘,熱刺球星哈利雲克斯喺中場左側拎波後,大腳踢向龍門竟然直飛入網,統計顯示入波距離足足達53.7碼,係歐霸盃史上第3遠距離入波(最遠紀錄為09/10球季韋根中場祖迪高美斯嘅61.2碼);73分鐘熱刺再有盧卡斯莫拉入波埋齋。領隊摩連奴喺完場前8分鐘,仲派出只有16歲零247日嘅史加歷上陣,令佢成為熱刺史上歐洲賽最年輕上陣球員。
賽後話題都集中喺哈利雲克斯個驚天金球入面,熱刺名宿荷度直播期間表示:「佢當時有好多時間,突然間就射埋去,我認為佢係有意偷襲。」但尷尬嘅係,哈利雲克斯賽後直認自己完全係「符碌」:「我都想話自己係專登射門,但我要好誠意咁講我唔係。當時我見到加里夫巴利走位,結果我嘅傳波太大力......無論如何最後都係入波,我好開心。」哈利雲克斯對上一次入波,已經係2019年1月,而呢個入波亦係佢今季唯一一次命中目標嘅攻門,結果就成為超級入球。