倫敦大霧阿仙奴滯留挪威　備戰狼隊濕滯

《英超刨績王》加強版，最強數據一網打盡：http://win.on.cc/football/　

阿仙奴喺歐霸分組賽作客擊敗莫迪進身32強，當然值得慶賀，不過佢哋賽後就返唔到英國，要喺挪威留多一晚，影響備戰周日鬥狼隊嘅大戰。

原本阿迪達安排賽後離開球場，即刻坐旅遊巴去機場，跟住就飛番倫敦，點知倫敦太過大霧，佢哋嘅航班要取消，成隊波被逼要返酒店，喺挪威住多一晚。

英國傳媒報道，阿迪達諗住畀球員返屋企休息一晚，到當地時間周五下晝再操，依家成隊要周五朝早先飛番倫敦，跟住就要即刻投入訓練，抖都冇得抖。最大鑊嘅係，唔知到時會唔會因為機場太大霧又被取消航班，據知，阿仙奴後勤人員已計劃，使用其他機場返回倫敦，不過到時又舟車勞頓，實影響備戰狼隊。