水晶宮老人兵頂唔到尾　完場前吞喜鵲雙蛋

《英超刨績王》加強版，最強數據一網打盡：http://win.on.cc/football/　

周六(28日)凌晨英超獨腳戲，水晶宮主場出擊0比2輸畀紐卡素，近4場聯賽第3度落敗。水晶宮今場正選平均年齡為30歲零182日，係今季英超最大年紀陣容，結果佢哋雖然大部份時間佔上風，但踢到尾段終於頂唔住而飲恨。

水晶宮有王牌前鋒韋費特沙夏因確診新冠肺炎繼續缺陣，相反紐卡素有首席射手卡林威爾遜復出，成為勝負最大分野。水晶宮形勢上風，紐卡素門將卡爾達路屢救險球力保不失，不過去到尾段水晶宮球員已經跌Watt。88分鐘，紐卡素巴西前鋒祖連奴連過2關後，助攻畀卡林威爾遜入波，100秒後卡林威爾遜投桃報李，助攻畀祖連奴入波鎖定2比0勝局。

水晶宮今場有57%控球率，不過數據顯示佢哋對上7次喺英超控球率超過5成嘅賽事全部輸晒，喺呢7場波入面合共87次攻門只入1球，似乎鶴臣呢隊水晶宮都係啱踢穩守突擊多啲。